Bernameya 1’ê Îlonê ya Êlihê diyar bû 2025-08-29 09:50:20 ÊLIH - Li Êlihê dê bi boneya 1’ê Îlonê Roja Aştiyê ya Cîhanê meş were lidarxistin û “Kursiya Aştiyê” bê danîn.   Amedekariya çalakiyên bi boneya 1’ê Îlonê Roja Aştiyê ya Cîhanê didomin û bernameya çalakiyên bajaran diyar dibin. Li Êlihê bi pêşengiya Platforma Ked û Demokrasiyê dê bi dirûşma “Niha dema qêrîna aştiyê ye” rêzeçalakî bên lidarxistin. Platforma Ked û Demokrasiyê dê ji Xaçerêya Basinê heta Parka Yilmaz Guney meşeke girseyî li dar bixe û piştre li vir “Kursiya Aştiyê” deyne. Meş dê saet di 18.30’an de bê destpêkirin.   Hevberdevaka Platforma Ked û Demokrasiyê ya Êlihê Narîn Erolê, anî ziman ku bi salan e bi hêviya civakeke azad û aştiyê 1’ê Îlonê pêşwazî dikin. Narîn Erolê, bal kişand ser atmosfera ku “Banga Aştiyê û Civaka Demokratîk” a Rêberê Gelê Kurd Abdullah Ocalan çêkiriye û diyar kir ku geşedanên ku rû dane hêviya aştiyê xurttir kiriye û  got: “Her tim bi hêviya aştiyê û hêviya civakeke demokratîk û jiyana di welateke demokratîk de hebû. Êdî ji bo vê yekê mercên têkoşînê heye. 1’ê Îlona îsal dê di atmosfereke wiha de bê pêşwazîkirin. Li Êlihê bi meşa bi heybet ve em ê daxwaza gelê Êlihê ya ji bo aştiyê nîşanî cîhanê bidin.”   DÊ ‘KURSIYA AŞTIYÊ’ BÊ DANÎN       Narîn Erolê, rave kir ku dê piştî meşê “Kursiya Aştiyê” deynin û li gel guhdar bikin û wiha dawî li axaftina xwe anî: “Hemû kesên ku peyva aştiyê bi lêv dikin dibin hedefe vê pergalê. Niha dema qêrîna aştiyê ye. Divê em bînin ziman ku pêdiviya ciwanan, jinan, cotkaran, karkeran, hejaran çiqas bi aştiyê heye û bi mîsogerkirina aştiyê ve wê çi bi dest bixin.”