AMED - Hevseroka Giştî ya DBP'ê Çîgdem Kiliçgûn Uçarê anî ziman ku Abdullah Ocalan diyar kiriye ku ew amade ya gavan biavêje û got: "Di 15'ê Sibatê de 'mafê hêviyê' bi cih bînin, em aştiya ku gel bi hesreta wê ye bi hev re ava bikin."
Hevseroka Giştî ya Partiya Herêmên Demokratîk (DBP) Çîgdem Kiliçgun Uçar di mîtînga "Ji bo aştiyê azadî" ya li Amedê ku bi hezaran kes beşdar bûn, axivî. Çîgdem Kiliçgun Uçarê rojnamegerên hatin qetilkirin bi bîr anî û got: "Yên ku difikirin ku bi qetilkirina Azîz Koyluoglû wê têkoşînê bi dawî bikin, bi hezaran Nazim, Cîhan û Azîz hene."
Çîgdem Kiliçgun Uçarê bal kişand ser gengeşeyên li ser çareseriya pirsgirêka kurd û got: "Êdî dem hatiye ku em bi qasî zehmetiyên aştiyê, behsa axaftina li ser wê jî bikin. Aştî avakirina pêşerojeke demokratîk ya bi hev re ye. Bi salan e ku nasnameya me, têkoşîna me, zimanê me, baweriya me, azadiya me li cîhanê bûye mînak. Ji bo ku erdnîgariya ku em lê dijîn bi demokrasiyê re rû bi rû bimîne, ji bo jin neyên qetilkirin û kedkar xwe nekujin û li Kurdistan û cîhanê zarok neyên qetilkirin. Kî dixwaze demokrasî bê vî welatî û kî diqîre ku azadî pêkan e? Birêz Abdullah Ocalan e ku 26 sal in li Îmraliyê li dijî tecrîdê li ber xwe dide. Gelê kurd, tirk û gelen Rojhilata Navînê li dor fikirên wî kom bûne. Divê em ne kesên aştiyê naxwazin, kesên aştîxwaz guhdar bikin."
‘DI 15'Ê SIBATÊ DE MAFÊ HÊVIYÊ PÊK BÎNIN'
Çîgdem Kiliçgûn Uçarê bal kişand ser "mafê hêviyê" yê Rêberê PKK'ê Abdullah Ocalan û got: "Birêz Ocalan diyar kir ku ew amade ye gavên pêwîst biavêje. Di 15'ê Sibatê de 'mafê hêviyê' bi cih bînin, em aştiya ku gelên Rojhilata Navîn dixwaze ava bikin. Di hiqûqê de cihê 'mafê hêviyê' heye. Bila tu kes behsa şer neke. Kesên li hemberî aştiyê şer wekî vebijêrkekê didin der winda kirin. Ne qoltixên wan e jî navên wan man."
Çîgdem Kiliçgûn Uçar got: "Guh bidin gelê kurd yê ku nasnameya piralî ya vî welatî hildigire. Gelê kurd mafên tu kesî nadize, tiştên ku ji wî hatiye dizîn û hatiye stendin dixwaze. Çavê me li tu kesî nîne. Werin em bi hev re sedsaleke nû ava bikin. Birêz Ocalan bi peyamên xwe her tim di nava me de ye. Niha dema pêkanîna wan e. Ez têkoşîna we bi rêzdarî silav dikim, modela Rojavayê ji bo tevahiya cîhanê ronahî ye. Divê çareseriya demokratîk a li Tirkiyeyê li Rojavayê bigihê statuyê."