SÊRT - Hevserokên Giştî yên DBP’ê Çîgdem Kiliçgun Uçar û Keskîn Bayindir û Hevserokê Giştî yê DEM Partiyê Tuncer Bakirhan çûn serdana şîna Faruk Saglam. 

 

Ji bo Faruk Saglam ku di navbera salên 2010-2012’an de Hevserokatiya Partiya Aştî û Demokrasiyê (BDP) ya Sêrtê kir û endamê Meclisa Partiyê (PM) yê Partiya Wekhevî û Demokrasiyê ya Gelan (DEM Partî) ê berê bû, di 19’ê Gulanê de xwîn çû ser mejiyê wî û jiyana xwe ji dest da. Ji bo Saglam, li Mala Şînê ya Seyît Yûsûf Yavuz a li navçeya Misircê ya Sêrtê şîn hate danîn. Hevserokên Giştî yên Partiya Herêmên Demokratîk (DBP) Çîgdem Kiliçgun Uçar û Keskîn Bayindir, Hevserokê Giştî yê DEM Partiyê Tuncer Bakirhan, parlamenter, endamên Komeleya Alîkarî Piştevanî Yekitî û Çandê ya Kesên Xizmên Xwe li Dergûşa Şaristaniyê Windakirin  (MEBYA-DER), Meclisa Dayikên Aştiyê û aktîvîstên Tevgera Jinên Azad (TJA) çûn serdana şînê. 

 

'PIRSGIRÊK ÇARESER DIKIR’

 

Tuncer Bakirhan di şînê de axivî û got: “Ez şahidê têkoşîna Faruk bûm. Hevalekî gelek têgihiştî bû û peywira xwe bi layiqî cîbicî dikir. Di demên me yên herî teng de kesê herî aram disekinî ew bû. Dema me nedikariya pirsgirêkekê çareser bikin, wî çareser dikir. Her tim ji bo gelê xwe li ber xwe da. Li her dera diçûyê pirsgirêk çareser kir. Em soz didin hevalên xwe yên me di dema dawî de windakirin ku dê têkoşîna wan bi ser bixin. Serê gelê me sax be.” 

 

‘LI HER DERA DIÇÛYÊ ŞOPA XWE LÊDIHIŞT’

 

Hevşaredarê Xelfetî ya Rihayê Mehmet Karayilan ku li şûna wî qeyûm hatiye tayînkirin jî got ku ew şahidên têkoşîna birûmet a Saglam in. Karayilan, got: “Hevalê Faruk bi fedakariyeke mezin têkoşîna xwe domand. Li her derê diçûyê şopa xwe dihişt.” 

 

Bavê Saglam, Veysî Saglam jî spasiya kesên hatine serdanê kir û got: “Faruk ne zarokê me, zarokê we tevan bû. Spasiya we dikim ku hûn xwedî li têkoşîna wî derketin.” 

 

Şande dê piştre jî biçe serdana şîna Hevserokê DEM Partiyê yê Êlihê Mûstafa Tekîk.