MÊRSÎN- Hevserokê TUAY-DER Çukurovayê Mahsum Geçer bal kişand ser rewşa girtiyên nexweş û bi bîr xist ku nêzîkî 350 girtiyên nexweşiya wan giran hene û got: "Azadiya girtiyên nexweş gava herî berbiçav a ber bi aştiyê ve ye."
Xebatên Pêvajoya Aştî û Civaka Demokratîk ku ji hêla Rêberê Gelê Kurd Abdullah Ocalan ve hat destpêkirin, didomin. Di vê çarçoveyê de, Komîsyona Hevgirtina Neteweyî, Biratî û Demokrasiyê ku di meclisê de hat avakirin, ji bo guhdarîkirina aliyan civînan didomîne. Bang tên kirin ku samîmiyeta pêvajoyê were nîşandan û berdana girtiyên nexweş wekî gava yekem be.
Hevserokê Komeleya Alîkariya Malbatên Girtî û Hikûmxwaran a Çukurovayê (TUAY-DER) Mahsum Geçer û Hevseroka TUAY-DER a Antalyayê Nazîme Bayhan, li ser binpêkirinên mafên mirovan ên li girtîgehan, pêkanînên li hember girtiyên nexweş û malbatên wan û hêviyên xwe ji komîsyona ku li Meclisê hatiye avakirin axivîn.
BINPÊKIRINÊN MAFAN
Mahsum Geçer diyar kir ku tenduristiya girtiyên nexweş ên li girtîgehan xirabtir dibe û got ku gelek ji wan nayên muayeneyênkirin û mafê wan ê xweghandina tenduristiyê tê binpêkirin. Geçer got: "Nêzîkî 350 girtiyên bi nexweşiyên giran hene ku divê bi lezgîn werin berdan. Azadiya girtiyên nexweş gava herî berbiçav a ber bi aştiyê ve ye. Heta ku girtiyên nexweş di girtîgehê de bin, mafên wan tên desteserkirin."
Geçer bal kişand ser binpêkirinên ku malbat û girtiyên nexweş bi wan re rû bi rû dimînin û got ku pêkanînên wekî lêgerîna li hundirê dev û tazî berdewam dikin û veguhestina dubare ya girtiyan ji bo bajarên cuda ji bo malbatan dibe sedema eziyetê. Geçer diyar kir ku divê ev pêkanîn tavilê werin rawestandin. Geçer lê zêde kir ku bi polîtîkayên sirgûnkirinê ne tenê girtiyan, lê di heman demê de malbat, hezkiriyên wan û tevahiya civakê tên cezakirin. Divê komîsyona meclisê demildest binpêkirinên li girtîgehan çareser bike."
Geçer diyar kir ku welat bûye "girtîgeheke vekirî" û Abdullah Ocalan ew kes e ku dê welat ji vê rewşê rizgar bike.
'DIVÊ BIRÊZ OCALAN Û GIRTIYÊN NEXWEŞ AZAD BIBIN'
Hevseroka TUAY-DER a Antalyayê Nazîme Bayhanê jî diyar kir ku pêvajoya ku bi Abdullah Ocalan dest pê kiriye di raya giştî de hêvî ji nû ve geş kiriye û ji dewletê xwest ku gavên samîmî bavêje. Nazîme Bayhanê diyar kir ku binpêkirinên mafên mirovan li girtîgehan, bi taybetî li Girtîgeha Girtî ya Tîpa S a Manavgatê, berdewam dikin ku girtî bi xistine hucreyên yekkesî têne cezakirin. Nazîme Bayhanê got: "Girtiyên nexweş nabin nexweşxaneyan, dermankirina wan nayê qebûlkirin, nexweşên giran nayên berdan. Divê ev pêkanîn bi dawî bibin û girtiyên nexweş werin berdan. Ji bo ku komîsyona ku hatiye avakirin xizmetê ji pêvajoyê re bike, divê pêşî bi birêz Ocalan re hevdîtinê bike; divê girtiyên nexweş werin berdan."