Jinan li dijî feraseta dewlet-îktidar-zilam û desteserkirina maf û hiqûq dest dane destê hev û mil dane milê hev û qadên 8’ê Adarê tije kirin. Jin xwedî li têkoşîn û azadiya xwe derdikevin. Li qadên ku pergala zilam rê li ber şer, kedxwarî û talana xwezayê vekiriye tê protestokirin û dengê dirûşma “Dem dema azadiya jinan e” ji qadan olan dide.
Perwerdekara xweparastinê Buşra Yeşîlbaş, diyar kir ku xweparastin ji hewldaneke fizîkî wêdetir, hewldaneke li hemberî hemû awayên tahdeyê ye û tekane rêya li hemberî pergala nêrza ya vê têkoşînê wekî "sûc" nîşan dide, têkoşîn û rêxistinbûyîn e.
Rêvebera OHD'a Wanê Leyla Kaplan, anî ziman ku tu eleqeya rastiyê û rapora ATK'ê ya "dikare di girtîgehê de bimîne" ya derbarê Aysel Tugluk de bi hev tune ye û got: "Em ê li dijî îqtidara ku dixwaze pêşengên têkoşîna jinan bitepisîne, ji bo berdana girtiyan tim biqîrin."
Girtiyên PKK’î û PAJK’î ji bo 8’ê Adarê daxuyanîiyeke nivîskî dan û ev tişt gotin “Li ser esasê regeza Bîrdoziya Rizgariya Jinan a Rêbertiya me, divê zindan di serî de em li her derê nêrîna jinan serwer bikin.”
Meclisên Jinan ên HDK’ê bi boneya 8’ê Adarê peyamek parve kir û wiha got: “Weke jinên ku mohra xwe li dîroke xistine, em ê cihê xwe di nava berxwedan û têkoşînê de bigirin. Êdî hîn bibin; em naçin û xelas nabin. Em ê bi ser kevin.”
Danişîna doza Seroka Komeleya Jinan a Rosayê Adalet Kaya îro li Amedê hate dîtin. Parêzera Kaya, biryarên xerakirinê yên îstînafê ku ji bo du rêveberên komeleyê yên di dosyayên cuda de dihatin darizandin, pêşkeşî dadgehê kir.
Ji bo JINNEWS'ê ku bi şîara "Bi pênûsa jin di şopa heqîqetê de" hat avkirin, bi etîketa "#jinnewshakikatinizinde (jinnewsdişopaheqîqetêde)" li ser medya sanal wê xebata hashtagê bê kirin.
Parlamentera HDP'ê Dîlan Dîrayet Taşdemîr, ji bo ku 8'ê Adarê weke betlaneya fermî bê îlankirin pêşniyarqanûnek da meclisê.
Berdevkên komîteyên zarok, ekolojî û aboriyê yên Kongreya Starê, diyar kirin ku piştî Şoreşa Rojava li herêmê ji bo jinan her roj 8'ê Adarê ye û ev tişt gotin: "Weke ku me jinan azad kir em ê Serok Apo jî azad bikin."
Jinên parastvanên mafên mirovan, diyar kirin ku wê di yekemîn salvegera Nobeta Edaletê ya malbata Şenyaşar de li ber Edliyeya Rihayê bin û banga tevlîbûna nobetê kirin.
Li Kolana Sakaryayê, polisan êrişî jinên ku derbarê 8'ê Adarê de daxuyanî dan kirin û herî kêm 5 jinan binçav kirin.
Li Stenbolê jinan bi boneya 8'ê Adarê hevdîtinek mezin li dar xist. Di metna hevpar a li ser navê rêxistinên jinan hat xwendin de ji bo siyasetmedara girtî ya nexweş Aysel Tugluk û jinên girtî yên nexweş azadî hat xwestin.
Bi hezaran jin, bi şîara "Li dijî tundiya zilam û dewletê, li dijî qrîz û xizaniyê bijî 8'ê Adarê" li Anitparqê hatin gelhev.
Komîsyona Jinan a ÎHD’a Amedê bi beşdariya Hevseroka xwe Giştî Eren Keskîn panela “mafê jinan” li dar xist. Keskîn got Ewropa şirîkê hemû sûcên li Tirkiyê ye.
Li gelek bajaran jin daketin qadan û diyar kirin ku ew bi ruhê coşa 8’ê Adarê dê biherikin qadên Newrozê. Jinên Cizîra Botan jî li dijî polîtîkayên asîmîlasyonê meşek li dar xistin.